EJ desididong sumungkit ng medalya sa Paris
MANILA, Philippines — Ibubuhos ni Asian champion Ernest John ‘EJ’ Obiena ang buong lakas nito para masigurong makapag-uuwi ito ng medalya sa 2024 Paris Olympics.
Kumpiyansa si Obiena na galing sa matagumpay na kampanya sa katatapos na 19th Asian Games sa Hangzhou, China kung saan umani ito ng gintong medalya kalakip ang bagong Asian Games record.
“I think it’s pretty good but there’s still a long way to go. A lot of things can change but I’m pretty confident and I think we have better odds than the last time,” ani Obiena.
Maganda ang rekord ni Ob iena sa taong ito.
Naitarak ni Obiena ang Asian record na 6.0 meters sa Bergen Jump Challenge sa Norway noong Hunyo.
Naulit ito ni Obiena sa World Championships na ginanap sa Budapest, Hungary kung saan nakasungkit ito ng pilak sa likod ni world champion Armand Duplantis.
“I don’t think there is more expectation of me in Paris than I had in the Asian Games. I owe you guys for writing that ‘it’s a sure gold’. That was heavy but I kinda long for it, I enjoyed it. I guess I truly have been molded by the test of time,” ani Obiena.
Ipinagpatuloy ni Obiena ang dominasyon nito matapos kumana ng ginto sa Hangzhou Asiad kung saan nairehistro nito ang 5.90 metro para wasakin ang Asian Games record.
Tinabunan ni Obiena ang 5.70m na dating Asian Games record ni Seito Yamamoto ng Japan na nakuha nito noong 2018 sa Jakarta, Indonesia.
Magandang resbak ito para kay Obiena na nagkasya lamang sa ikapitong puwesto sa 2018 Asian Games tangan ang 5.30m.
- Latest
