Obiena ibinigay ang unang ginto ng pinas sa ASIAD

MANILA, Philippines —  Kagaya ng dapat asahan, inangkin ni World No. 2 pole vaulter Ernest John Obiena ang gold medal sa 19th Asian Games sa pamamagitan ng isang record-breaking performance kahapon sa Hangzhou, China.

Nagposte ang 6-foot-2 Asian champion ng bagong Asiad mark na 5.90 meters para dominahin ang laba­nan at sirain ang dating record na 5.70m ni Japanese Seito Yamamoto noong 2018 edition sa Palembang, Indonesia.

Tatanggap si Obiena ng cash incentive na P2 milyon mula sa gobyerno at bonus na P1 milyon buhat sa Philippine Olympic Committee (POC) para sa kanyang gintong medalya.

Ito ang pang-walong medalya ng Pinas sa quadrennial event matapos ang silver ni sanda fighter Arnel Mandal at anim na bronzes nina tennis player Alex Eala at Francis Casey Alcantara, sanda fighters Clemente Tabugara Jr. at Gideon Fred Padua, taek­wondo jin Patrick King Perez at wushu artist Jones Llabres Inso.

Sa boxing, nakapasok si Tokyo Olympics silver medalist Carlo Paalam sa quarterfinals matapos ta­lunin si Munarbek Seiitbek Uulu ng Kyrgyzstan, 4-1, sa men’s 57 kilogram.

Nasa quarterfinals din si Tokyo Olympics bronze medalist Eumir Felix Marcial, samantalang napatalsik si Fil-Australian John Marvin sa Round of 16 ng men’s 92kg.

Sa men’s basketball, yumukod ang Gilas Pilipinas sa Jordan, 62-87, sa agawan sa automatic quarterfinals slot sa Group C.

Haharapin ng Nationals ang Qatar para sa tsansang makasama sa quarterfinals.

Sa weightlifting, hindi nakasama si two-time Asian Junior champion Rosegie Ramos sa finals ng women’s 49kg category mula sa kanyang fifth place finish sa itinalang 87kg sa snatch at 103kg sa clean and jerk para sa total lift na 190kg.

Nakatakda namang bumuhat si Tokyo Olympics gold medal winner Hidilyn Diaz-Naranjo bukas sa women’s 59kg class.