Animam recovering sa surgery

MANILA, Philippines — Simula na ang recovery ni Jack Animam matapos sumailalim sa surgery para sa ACL injury na kanyang natamo sa makasaysayang kampanya sa Serbia bilang unang Filipina player doon.

Ibinahagi ni Animam ang pagsalang niya sa operasyon kahapon sa Amerika ayon sa kanyang Instagram story isang buwan matapos madale ng masaklap na injury.

Wala pang eksaktong petsa kung kailan makakabalik ang Gilas Pilipinas women’s team center subalit inaasahang hanggang kalahating taon ang itatagal para sa kanyang full recovery.

Nasa kasagsagan ng solidong kampanya si Animam sa First Women’s Basketball League of Serbia noong nakaraang taon nang matamo ang hindi inaasahang injury. Nagrerehistro siya ng 20.0 puntos at 14.3 rebounds sa walong laro para sa Radnicki Kragujevac. Hindi na niya natapos ang season nang magpaalam sa koponan noong Disyembre. Umukit siya ng kasaysayan noong nang pumirma ng kontrata noong Agosto bilang kauna-unahang Pinay import  sa Europa.