Cast ng quarterfinals kumpleto na

Rain or Shine lusot sa TNT 

MANILA, Philippines — Kinailangan ng Rain or Shine na manalo para makaiwas sa posibleng playoff laban sa NLEX sa No. 8 berth sa eight-team quarterfinal round.

Nagpaputok si James Yap ng 16 points para tulungan ang Elasto Painters na talunin ang TNT Tropang Giga, 80-74, papasok sa quarterfinals ng 2020 PBA Philippine Cup kahapon sa Angeles University Foundation Gym sa Angeles, Pampanga.

“Talagang importante itong laro na ito dahil kapag natalo kami may chance pa kaming malaglag,” sabi ni Yap. “Mabuti na lang nagtulungan kaming lahat.”

Kasabay ng pagtatala ng Rain or Shine, nakahugot din ng 16 points kay Javee Mocon, ng kanilang ikalawang sunod na panalo ay ang tuluyan nang pagkakasibak ng NLEX sa torneo.

Makakasama ng Road Warriors sa maagang bakasyon ang Blackwater Elite, NorthPort Batang Pier at Terrafirma Dyip.

Nagsalpak ang two-time PBA MVP na si Yap ng apat na three-point shots sa first half para sa 43-38 halftime lead ng Elasto Painters patungo sa 67-57 abante sa pagsasara ng third period.

Naitabla ng Tropang Giga ang laro sa 72-72 mula sa basket ni Poy Erram sa huling 58.3 segundo ng fourth quarter.

Ang split ni Norbert Tores, fastbreak layup ni Kris Rosales at dala-wang free throws ni Mocon ang muling naglayo sa Rain or Shine sa 79-74 sa natitirang 19.5 segundo.