Lalaking isa lang ang paa na naglalaro ng basketball gustong makilala ni Pingris

MANILA, Philippines — Natuwa at humanga si Magnolia Hotshots star Marc Pingris sa lalaking iisa lang ang paa na naglalaro ng 3x3 basketball sa kalye sa isang viral na video.

Gustong makita ng 39-gulang na power forward ang lalaking PWD (person with dissability) upang bigyan ng jersey at sapatos kaya nag-post si Pingris sa kanyang Instagram para mahanap ang nasabing lalaki.

“Kong sino man ang nakakakilala sa tao na eto pls naman bigay n’yo name at number n’ya sa akin, DM n’yo po pls gusto ko siyang makilala,,pls! pls! kahit mabigyan ko lang ng sapatos at sando at gusto ko siyang makalaro,” post ni Pingris sa Instagram, may hashtag pang #magkikitarintayosoon.

Mapapanood sa video na pinasahan ang lalaki na isa lang ang paa ng kanyang kakampi, nag-drive pakanan at saka pumihit pakaliwa sabay fade away, swak ang bola at napasigaw naman ng “Bang!” ang kumukuha ng vi-deo. “Magaling talaga maglaro ‘yan.” aniya pa.