Tropang Texters sumosyo sa liderato

MANILA, Philippines — Limang players ang umiskor ng double-fi­gures para sa ikalawang su­nod na pananalasa ng TNT Katropa.

Iginiya ni import KJ McDaniels ang 103-91 pa­nalo ng Tropang Texters laban sa Rain or Shine Elasto Pain­ters mula sa kan­yang ipinosteng 37 points, 13 re­bounds, 5 assists at 5 blocks sa 2019 PBA Governor’s Cup kahapon sa Smart Araneta Co­liseum.

Nagmula ang TNT Ka­tropa sa 135-107 pag­du­rog sa Blackwater, habang nalasap ng Rain or Shine ang kanilang ikalawang kabiguan sa tatlong laban.

“We just have to stay together as a team and follow our gameplan,” ani McDaniels na na­­ging teammate ni Terrence Jones para sa Houston Rockets sa NBA. 

Nagdagdag si Troy Ro­sario ng 16 points ka­sunod ang 15 at tig-12 markers nina Jayson Cas­tro, RR Pogoy at Don Trollano, ayon sa pagkakasunod, para sa Tropang Texters ni coach Bong Ra­vena.

Binanderahan naman ni reinforcement Joel Wright ang Elasto Pain­ters mula sa kanyang 20 points, 8 boards, 3 assists.

Hindi na siya ipinasok ni coach Caloy Garcia matapos ang Flagrant Foul Penalty 1 kay Rosario sa huling 3:50 minuto ng fourth quarter kung sa­an sila nakalapit sa 86-91.

Ang magkasunod na ti­rada ni McDaniels at three-point shot ni Pogoy ang tuluyan nang naglayo sa TNT Katropa sa 103-88 sa nalalabing 56.4 segundo ng laro.

Nauna nang nakaba­ngon ang Rain or Shine, nakahugot kay rookie Javee Mocon ng 19 points, sa 86-90 mula sa basket ni Wright sa 4:39 minuto ng final canto mula sa 12-point deficit, 59-71, sa 3:23 minuto ng third pe­riod.