Bolts binalasa ang Aces

MANILA, Philippines -  Halos lahat ay ginawa na ni point guard Baser Amer para maipanalo ang Bolts.

Humakot ang 5-foot-9 na si Amer ng 19 points, 9 rebounds, 5 assists at 2 steals para tulungan ang Meralco sa 99-91 paggiba sa Alaska sa 2017 PBA Commissioner’s Cup kagabi sa Mall of Asia Arena sa Pasay City.

Nag-ambag si import Alex Stepheson ng 17 markers, habang may 15 at tig-14 points sina Jared Dillinger, Chris Newsome at Justine Chua, ayon sa pagkakasunod, para sa pagbangon ng Bolts sa una ni-lang kabiguan sa mid-season conference.

Kinuha ng Meralco ang 25-point lead, 91-66, mula sa dalawang free throws ni Dillinger sa 6:01 minuto ng fourth quarter bago nakadikit ang Alaska sa 83-93 agwat sa huling 1:41 minuto nito.

Binanderahan ni import Cory Jefferson ang Aces sa kanyang game-high na 32 points.

Sa unang laro, ginulat ng Blackwater ang Globalport, 118-113, para sa kanilang unang panalo matapos ang apat na sunod na kamalasan.

Kumolekta si import Greg Smith ng 40 points at 19 rebounds para sa 1-4 baraha ng Elite.

Itinampok ng Batang Pier ang bagong import na si Malcolm White, pumalit kay Sean Williams, na tumipa ng 33 points at 17 boards.