Lee, Pringle pararangalan sa PBAPC Awards

MANILA, Philippines – Pagsasaluhan nina Rain or Shine stalwart Paul Lee at Stanley Pringle ng Globalport ang stage sa gaganaping PBA Press Corps (PBAPC) annual Awards Night sa Century Park Hotel sa Sept. 16.

Si Lee ang tatanggap ng PBAPC-Accel Order of Merit Award habang pangungunahan ni Pringle ang isa sa 1-2 punch ng Batang Pier ang  five-man All-Rookie team sa pagkilala ng PBAPC ng mga top performers ng nakaraang PBA season.

Ang Elasto Painter guard ay awtomatikong Order of Merit awardee matapos mapili ng apat na beses na Accel-PBAPC Player of the Week sa nagdaang season.

Wala nang ibang player na naging Player of the week ng mahigit dalawang beses.

Sa 53 games, ang combo guard mula sa University of the East ay nag-average ng 15.5 points per game sa likod ng 39 percent shooting mula sa three-point range, 4.5 rebounds at 3.2 assists.

Kasama naman ni Pringle sa All-Rookie squad sina Chris Banchero ng Alaska, Jake Pascual ng Barako Bull, Matt Ganuelas Rosser ng Talk ‘N Text at Jericho Cruz ng Rain or Shine.

Ang Globalport guard ang top pick sa draft noong nakaraang season kung saan tinanghal siyang Rookie of the Year.

Tampok sa gabi ng parangal ay ang paggawad ng  Virgilio ‘Baby’ Dalupan Coach of the Year award, ipinangalan sa legendary Crispa Redmanizers coach na tinaguriang ‘The Maes-tro.’ Igagawad din ang Danny Floro Executive of the Year award na pagkilala sa batikang  team manager ng Crispa franchise bukod pa sa William ‘Bogs’ Adornado Comeback Player of the Year award.