Lady Blazers binigo ang Lady Chiefs; No. 4 seat napasakamay ng Tigresses
MANILA, Philippines – Isang set na lamang ang kinailangang ipanalo ng Arellano Lady Chiefs upang makahirit ng playoff para sa huling upuan sa semifinal round ng Shakey’ V-League Season 12 Collegiate Conference.
Pero iba ang nangyari dahil naitaas ng St. Benilde Lady Blazers ang kanilang laro, habang tila isang nauupos na kandila ang NCAA champions na Lady Chiefs para angkinin ang 23-25, 25-27, 25-23, 25-23, 15-10 panalo sa pagtatapos ng quarterfinals kahapon sa The Arena sa San Juan City.
Si Janine Navarro ay may nangungunang 31 puntos, habang tumulong sina Jeanette Panaga, Ranya Musa at Melanie Torres sa mahahalagang tagpo ng laro upang wakasan ng St. Benilde ang kampanya bitbit ang unang panalo sa pitong laro.
Patok ang Arellano at naipakita nila ang larong inaasahan nilang ilalabas sa naunang dalawang set.
Ngunit noong unti-unti nang bumabangon ang Lady Blazers ay nasira ang focus ng Lady Chiefs para madisgrasya ang hinahangad na playoff.
Ang pagkulapso ay makikita sa 44 errors ng Lady Chiefs upang ibigay na ang ikaapat at huling tiket sa Final Four sa UST Tigresses.
Sa Sabado magsisimula ang best-of-three semifinals series at katapat ng UST ang Ateneo Lady Eagles, habang ang mga nagtuos sa finals noong nakaraang taon na FEU Lady Tamaraws at National University Lady Bulldogs ang magkikita sa ikalawang Final Four match.
- Latest
