Marcial, Ladon sa finals na

BANGKOK – Ginamit ni Eumir Felix Marcial ang kanyang malakas na kaliwa upang igupo si Japanese Suzuki Yasuhiro, 2-1 para makarating sa finals ng welterweight division sa kasalukuyang ASBC Asian Boxing Championships sa Thammasat University Gymnasium dito.

Ito ang ikaapat na sunod na panalo ng 19-anyos na si Marcial sa event na nilahukan ng tinatayang 200 mahuhusay na boxers mula sa 33 Asian nations.

Haharapin sa Sabado ni Marcial, tubong Zamboanga na sumanib sa Philippine team apat na taon pa lamang ang nakakaraan, ang pambato ng Kazakhstan na si top seed Daniyar Yeleussinov.

Manalo, matalo, sigurado na si Marcial ng slot sa AIBA World Championships na gagawin sa Oct. 5-15 sa Doha, Qatar na isang qualifying event para sa 2016 Rio Olympics.

Sigurado na rin sa AIBA World Championships si light-flyweight Rogen Ladon na nanalo rin kay  kay Mongolian Gab-Erdene Gankhuyag, 3-0 para makapasok din sa finals.

“Masakit na talaga kahit jab lang ang tumatama. Pero tiniis ko na lang at pinilit kong sumuntok nang sumuntok,” pahayag ni Marcial,  gold medalist sa 2011 World Junior Championships.