7th season ng ISAA nakatakda sa Agosto 19
MANILA, Philippines - Hindi man sila kahanay ng dalawang malalaking collegiate leagues na NCAA at UAAP ay kumbinsido naman ang pamunuan ng Inter-Scholastic Athletic Association (ISAA) na gumagawa na ng sariling marka ang nasabing liga.
Sa pagdalo ng mga opisyales kahapon sa PSA Forum sa Shakey’s Malate, sinabi ni ISAA president Melanie Florentino ng Feati na napapansin na rin ang liga dahil may mga manlalaro na rin sila na kinukuha ng mga koponan sa commercial leagues tulad ng PBA D-League.
Ilang koponan din ang pinupuntahan ng mga taga-probinsya para rito ipakita ang galing sa paglalaro kasabay ng makukuhang magandang edukasyon sa kanilang mga paaralan.
“We are now on our seventh year and I can say that we have survived the challenge,” wika ni Florentino. “It’s not easy to manage a league but we have achieved our goal to have a strong sports program, promote sportsmanship and camaraderie.”
Sa Agosto 19 ay magbubukas ang ika-pitong taon sa Cuneta Astrodome sa Pasay City at ang pitong regular teams ay sasamahan ng isang guest team para magtagisan sa titulo sa basketball.
Mangunguna rito ang Philippine Merchant Marine School (PMMS) na siyang nagdedepensang kampeon, habang ang ibang datihan ay ang Feati, St. Dominic College of Asia, Manila Taitana College, Manila Adventist College, Philippine Women’s University at La Consolacion Manila.
Ang PATTS ang guest team na isang champion team sa ibang naunang liga na sinalihan.
Bukod sa basketball ay magdaraos din ng laro sa swimming, badminton, table tennis at volleyball. (AT)
- Latest
