NU, Arellano sumosyo sa FEU
MANILA, Philippines – Lumutang muli ang bangis ng National University Lady Bulldogs nang maglaro sila ng kumpleto sa kinuhang 25-23, 26-24, 25-19 panalo laban sa nagdedepensang FEU Lady Tamaraws sa Shakey’s V-League Season 12 Collegiate Conference kahapon sa The Arena sa San Juan City.
Sina Dindin Manabat at Myla Pablo ay nagbalik sa NU matapos mawala sa huling dalawang laro ng koponan nang makasama sa koponang naglaro sa Vietnam upang makipagtuwang kay Jaja Santiago para sa hindi inaasahang straight sets win laban sa FEU.
Ang kumbinsidong panalo ay tila pambawi matapos talunin ng Lady Tamaraws ang Lady Bulldogs sa kampeonato noong nakaraang taon sa ligang inorganisa ng Sports Vision katuwang ang Shakey’s at handog ng PLDT Home Ultera.
Winalis naman ng Ateneo Lady Eagles ang Group B mula sa 25-16, 25-14, 25-13 panalo laban sa TIP.
“Alam namin malakas sila at defending champion sila kaya tiniyak namin na may receive kami at may coverage sa bawat palo nila,” wika ni Pablo na may 13 puntos mula sa 10 kills, 2 blocks at 1 ace.
May anim na digs pa siya para makatulong sa depensa.
May 15 puntos, tampok ang 14 kills, si Manabat habang, si Santiago ay may tig-tatlong blocks at aces patungo sa 10 puntos.
Sa pagkakaroon ng iba pang spikers, ang setter na si Rica Diolan ay may 24 excellent sets, habang ang liberong si Fatima General ay may 10 digs at 16 excellent receptions.
Tanging si Remy Palma lamang ang nasa double-digits mula sa kanyang 10 puntos para sa FEU.
Natapos ang apat na sunod na panalo ng Lady Tamaraws upang magsalo sila ng Lady Bulldogs sa liderato ng Group A.
Pinabagsak ng Arellano Lady Chiefs ang University of the Philippines Lady Maroons, 25-23, 27-29, 25-23, 25-22, para makisosyo sa unahan.
- Latest
