Pagara umiskor ng KO win sa 1st round

DUBAI – Halos dalawang minuto lamang ang kinailangan ni undefea­ted Filipino boxer Albert ‘Prince’ Pagara para pa­bagsakin si Mexican Jesus Rios sa first round noong Biyernes ng gabi dito sa Dubai World Trade Center.

“Nung pumasok ‘yung hook, sabi ko, ‘Ay groge agad.’ Kaya tinuluyan ko na,” sabi ng 21-anyos na si Pagara (24-0-0, 17 KOs)na naidepensa ang suot na IBF Inter-Con­tinental su­per bantamweight title.

Matapos makaba­ngon mula sa unang pagka­katumba ay hindi na na­ka­tayo si Rios (31-8-1, 25 KOs) mula sa mag­ka­kasunod na rapido ni Pa­gara.

Itinigil ni referee Bruce McTavish ang laban nang hindi na makabangon ang Mexican na kinabitan ng oxygen mask.

Sinabi ng kanyang pro­moter na si Michael Al­deguer na pamumunuan ni Pagara ang unang Pi­noy Pride boxing card sa United States sa Oct. 17 sa StubHub Center.

“Yes, he will be there with (featherweight) Mark Magsayo. It’s time to bring Albert to the Uni­ted States,” wika ni Alde­guer kay Pagara.

Si Magsayo ay may bit­bit na 11-0 win-loss record kasama ang 9 KOs.

Umiskor naman si Jason Pagara ng 8th round technical decision win laban kay Ramiro Alcaraz.