Excited na ang lahat

Siguradong excited na ang lahat sa laban nina Manny Pacquiao at Floyd Mayweather Jr. sa May 2 sa Las Vegas Nevada.

Five years in the making ang laban na ito.

Ilang beses na nagnegosasyon pero hindi nagkakasundo dahil sa iba’t ibang demand ni Mayweather na ayaw ni Pacquiao.

‘Yun pala, papaubaya rin si Manny bandang huli para matuloy ang laban.

Pero marami ngayon ang may iba’t ibang haka-haka tungkol sa laban.

Na kesyo pinaatat lang ng dalawa ang mga tao para mas lalong lumaki ang laban at mas lalong lumaki ang kanilang kikitain.

Alalahanin natin na ang laban na ito ay sinasabing sisira sa lahat ng record sa kasaysayan ng boxing.

At dahil dito, sinasabing hindi lang isang beses maghaharap sina Pacquiao at Mayweather.

May teyoryang, tatlong beses maghaharap ang dalawang pinakasikat na boksingero ngayon.

Kaya ang unang laban ay alin man sa kanila ang mananalo.

Sa ikalawang laban ay mananalo ang isa.

At ang totoong laban ay ang kanilang ikatlong paghaharap.

Sa ikatlong laban magkakaalaman kung sino talaga sa kanilang dalawa ang hari ng boxing.

Sinasabi ring isa sa mga labang ito ay gagawin dito sa Pinas.

Posibleng magkaroon ng ikalawang “Thrilla in Manila’ na nangyari noong 1975 nang magharap sina Muhammad Ali and Joe Frazier sa Araneta Coliseum.

Sa tatlong labang ito, ilang milyong dolyares ang kikitain nina Pacquiao at Mayweather.

It’s worth the wait nga naman.

Pero mas maganda sana kung nangyari ito noong medyo bata-bata pa sila.