Bakers, Giants kukumpletuhin ang Final Four
Laro Ngayon (The Arena, San Juan City)
2 p.m. – Cebuana Lhuillier vs Jumbo Plastic
4 p.m. – Café France vs Bread Story –Lyceum
MANILA, Philippines – Pilit na pangangatawanan ng Café France Bakers at Jumbo Plastic Giants ang pagkakaroon ng mas mataas na seeding sa pagsagupa sa Cebuana Lhuillier Gems at Bread Story-Lyceum Pirates sa pagtatapos ng quarterfinal round ng PBA D-League Aspirants’ Cup sa The Arena sa San Juan City.
Ang mananalo sa nasabing dalawang laro ang siyang kukumpleto sa mga maglalaban sa semifinals kung saan naghihintay ang walang talong Cagayan Valley Rising Sun at Hapee Fresh Fighters na nalagay sa No. 1 at No. 2 spot.
Unang magkikita ang Gems at Giants ngayong alas-2 ng hapon bago palitan ng Bakers at Pirates sa alas-4.
Nalagay ang Gems at Pirates sa pang-lima at ikaanim na puwesto ngunit naihirit ang ‘sudden-death’ nang nangibabaw noong Huwebes.
Nagpakawala ang Gems ng 19-9 palitan sa huling yugto para sa 63-53 panalo, habang sinandalan ng Pirates ang magandang opensa tungo sa 79-72 tagumpay.
Pareho namang inspirasyon ng Bakers at Pirates ang makarating sa semifinals sa unang pagkakataon.
Para makuha ito ng mga bataan ni coach Edgar Macaraya ay kailangang magkaroon sila ng mas magandang opensa na hindi nangyari sa unang pagkikita.
Ang magandang pagtutulungan ng starters at bench ang magiging susi para magpatuloy ang hinahanap na makasaysayang kampanya sa liga ng baguhang Bread Story. (AT)
- Latest