Capadocia laban kay Tanpoco sa finals ng PCA Open

MANILA, Philippines – Idedepensa ni Marian Jade Capadocia ang kanyang korona laban kay fourth seed Maika Tanpoco sa la­dies’ singles ng 33rd Philippine Columbian Association (PCA) Open na inihahandog ng Cebuana Lhuillier at Metro Global Holdings sa PCA indoor courts sa Paco, Manila.

Ito ay makaraang gibain ng three-time champion na si Capadocia si sixth seed Marinel Rudas, 7-5, 6-4, pa­ra sa tsansang makamit ang kanyang pang-apat na PCA Open crown.

Naging madali naman para sa 19-anyos na si Tanpoco na dominahin si No. 5 Hannah Espinosa, 6-1, 6-0, sa torneong suportado ng Dunlop, Fujidenzo/Whirlpool, Babolat, Hon. Emmanuel “Manny” Pacquiao, Head, Accel, Malate Bayview Mansion, Coca-Cola Bottlers Phils. Inc., Philippine Prudential Life Insurance Company Inc. at Seno Hardware.

Magtutuos sina Capadocia at Tanpoco para sa titulo ngayong alas-11 ng umaga.

“Medyo alam ko na ang laro niya, pero hindi pa rin ako magkukumpiyansa sa laro namin,” sabi ni Capadocia kay Tanpo­co.

Nauna nang giniba ni Capadocia si Tanpoco, 6-2, 6-0, sa quarterfinals ng Lucena Open noong Mayo.

Samantala, maghaharap naman para sa men’s singles title sina eight-time champion Johnny Arcilla at top seed Patrick John Tierro sa ala-una ng ha­pon sa event na suportado rin ng United Auctio­neers Inc. Foton, Philippine Sports Commission, TLH Sports & Wellness Center/Solinco, Avida Land Corpo­ration, Stronghold Insurance, Ryobi MHI, GMA 7 at TV 5.

Makakatuwang naman ni Arcilla si Kyle Joshua Dandan laban kina Joseph Arcilla at Kim Saraza para sa men’s doubles finals.

Sasagupain nina Capa­docia at ng kapatid niyang si Jella sina Rudas at Edilyn Balanga para sa ko­rona ng ladies’ doubles event.