Rivera at Del Rosario sasabak sa World Cup
MANILA, Philippines - Magbabalik sa international finals ng prestihiyosong Bowling World Cup sina dating world titlist Biboy Rivera at Liza del Rosario.
Ito ay matapos pamahalaan nina Rivera at Del Rosario ang 2014 BWC national championship noong Biyernes sa SM North EDSA.
Dahil dito, nakamit nina Rivera at Del Rosario ang dalawang tiket para sa international competition na nakatakda sa Nobyembre 1-9 sa Wroclaw, Poland.
Tinalo ni Rivera, nanguna sa eliminations kasama ang 8-game round robin competition, si Benshir Layoso, 2-1 (256-258, 227-193, 232-177), sa men’s division.
Pinayukod naman ni Del Rosario si elimination topnotcher Lara Posadas, 2-0 (206-188), 225-205), sa ladies’ bracket.
Ito ang magiging ikatlong international stint ni Rivera at pang-lima naman ni Del Rosario, dalawang beses muntik makamit ang World Cup noong 2011 sa Pattaya, Thailand at noong 2004 sa Singapore.
Kumampanya din si Del Rosario sa international event noong 2007 sa Russia at noong 2009 sa Melaka, Malaysia.
Pumangatlo naman si Rivera sa kanyang unang BWC international finals appearance noong 2010 sa Toulouse, France.
Sina Paeng Nepomuceno, Lita dela Rosa at Bong Coo ang mga nagkampeon sa World Cup.
- Latest
