Abueva nagbida sa 2014 FIBA 3x3
MANILA, Philippines - Tamang-tama ang pagdating ni Calvin Abueva para maikasa ng Manila North ang 21-11 panalo kontra sa Xinzhuang ng Chinese-Taipei at umabante sa quarterfinal round sa 2014 FIBA 3x3 World Tour Manila Masters kahapon sa Mega Fashion Hall sa SM Megamall.
Nasa huling 4:31 minuto ang laro nang dumating si Abueva at agad na kinamada ang pitong sunod na puntos para kunin ang 17-11 kalamangan.
Hindi agad nakasama ng koponan ang Alaska forward dahil sinamahan muna ang asawa na nakatakdang manganak ng kanilang ikaapat na supling kahapon.
Naunang nalagay sa peligro ang asam na panalo sa Pool C dahil napilayan si Ian Sangalang, habang si Vic Manuel ay tinamaan ng siko sa ulo.
Nauna nang natalo ang Manila North sa Auckland, New Zealand, 11-16.
Umusad din sa quarterfinals na lalaruin ngayong hapon ang Manila South at Manila West.
- Latest
