Algieri payag nang labanan si Pacquiao
MANILA, Philippines - Naibsan na ang pangambang pagkawala ng pagkakataon ni Chris Algieri na makalaban si Manny Pacquiao.
Kinumpirma kahapon ni Bob Arum ng Top Rank Promotions ang pagkakasundo ng kampo ng bagong World Boxing Organization (WBO) light welterweight titlist na si Algieri para sa pagkakaplantsa ng laban nito kay Pacquiao.
“I have to talk to my lawyer, Dan Pancheri, who will spit out the contracts first thing (Wednesday) morning so they can have a copy of it in the afternoon,” wika ni Top Rank promoter Bob Arum matapos ang pulong ng mga co-promoters ni Algieri na sina Joe DeGuardia ng Star Boxing at Artie Pelullo ng Banner Promotions.
“We have a deal. On my end, it wasn’t a hard deal at all. I came up pretty much with what they were looking for and then Joe and Artie had to sit down with Algieri and cut it up fairly among themselves,” dagdag pa ng promoter.
Nauna nang kinabahan si DeGuardia na maaaring hindi matuloy ang laban ng 5-foot-10 na si Algieri sa 5’6 na si Pacquiao dahil sa pagpaparamdam ng una ng interes na makakuha ng mas malaki sa $1.5 milyon na alok ng Top Rank.
At matapos ang mahabang pagpupulong ay nagkasundo na sina DeGuardia at Pelullo.
Itinakda ang laban ng 35-anyos na si Pacquiao at ng 30-anyos na si Algieri sa Nobyembre 22 sa The Venetian sa Macau, China.
“We were able to sit down and go through everything Chris wanted to go over and put everything together. He’s gonna beat Pacquiao,” wika ni DeGuardia.
Itataya ni Pacquiao (56-5-2, 38 KOs) ang kanyang hawak na WBO welterweight crown laban kay Algieri (20-0-0, 8 KOs).
Si Algieri ay may may bachelor’s degree sa healthcare science mula sa Stony Brook University at master’s degree sa New York Institute of Technology.
Sa kanyang pag-agaw sa WBO light welterweight belt ni Ruslan Provodnikov noong Hunyo ay tumanggap si Algieri ng premyong $100,000.
Nagmula si Pacquiao sa panalo kay Timothy Bradley. Jr. para bawiin ang kanyang WBO welterweight crown sa kanilang rematch noong Abril. (RCadayona)
- Latest
