Shakey’s V-League, NCAA panauhin sa PSA Forum

MANILA, Philippines - Ang dalawang malaking sporting events na nakatakdang magbukas ngayong linggo ang isasalang sa Philippine Sportswriters Association (PSA) Forum ngayong umaga sa Shakey’s Malate.

Pangungunahan ng Shakey’s V-League Open Conference, magbubukas sa Linggo, ang mga bisita sa long-time public sports session na isinasaere sa DZSR Sports Radio 918 at inihahandog ng Accel, Shakey’s at ng Philippine Amusement and Gaming Corp.

Kakatawan sa premier women’s volleyball tournament sina Shakey’s marketing and guest engagement director Chez Manalaysay at Jam Evaristo, ang PR events and advocacy officer ng Shakey’s, kasama ang organizer na Sports Vision sa pamumuno nina chairman Moying Martelino, president Ricky Palou at Commissioner Tonyboy Liao.

Kasunod ng grupo sa naturang pang alas-10:30 ng umagang sesyon ang mga opisyales ng National Collegiate Athletic Association (NCAA) na sisimulan ang ika-90 season sa Sabado.

Si Mancom chairman Paul Supan ng host school Jose Rizal University at ilang miyembro ng NCAA Board ang tatalakay sa 90th NCAA season.