Motorcade inihanda para kay Martinez

MANILA, Philippines - Matapos makilala sa Sochi Winter Olympics, naghihintay kay  Michael Christian Martinez ang  isang pagsalubong pagdating niya bukas.

Naghanda ng motorcade para sa 17-gulang na si Martinez, ang unang Filipino figure skater na lumaban sa Winter Olympics na inihanda ng SM Prime Holdings Inc., ang property conglomerate ng SM Group of Companies.

Nadiskubre ni Martinez ang kanyang hilig sa fi-gure skating sa isa sa  ice-skating rinks ng SM, ang sikat na department store sa bansa.

Sa kanyang paglahok sa Sochi, sinalo ni SM Prime Holdings president Hans Sy ang malaking bahagi ng gastusin ni Martinez bagama’t may iba pang tumulong.

Sa kanyang total score na 184.25 points, tumapos si Martinez ng pang-19th mula sa 24 finalists noong Feb. 14 sa Iceberg Skating Palace.

“We are very proud of Michael. Not only did he give honor to our country, but he is also a shining example for the youth as someone who saw no limits to what he can achieve,” sabi ni Sy. “He has already inspired millions by following his dreams and by competing in the Winter Olympics. He will continue to inspire us all as he works towards earning medals in the future Olympic competitions.”

Pauulanan si Martinez ng mga regalo pagkatapos ng motorcade na nakatakdang magsimula ng alas-4:00 ng hapon at iikot ang  binatilyong skater sa Mall of Asia grounds sa Pasay City.

Sa kanyang pagsasanay, madalas si Martinez sa SM Southmall sa Las Piñas at lumipat sa SM Mall of Asia para sa iba’t ibang competitions.

Si  Martinez ay kasalukuyang pang-19th sa buong mundo, base sa kanyang nakaraang performance sa Winter Olympics kung saan nag-qualify siya matapos ang seventh place finish sa 2013 Nebelhorn Trophy sa Germany.

Pagkatapos ng Sochi, sinabi ni Martinez na pagtutuunan naman niya ang 2018 Winter Olympics na gagawin sa South Korea.

“I will be there,” sabi niya.