Matamis na panalo nina Donaire, Nietes at Sabillo

MANILA, Philippines - Isang dating hinirang na “2012 Fighter of the Year” at dalawang world boxing champions ang nag­pos­te ng kani-kanilang panalo sa nakaraang taon.

Matapos malasap ang kanyang unang kabiguan ma­karaan ang 11 taon na pamamayagpag, nagbalik sa kanyang porma si dating world unified super ban­tamweight champion Nonito ‘The Filipino Flash’ Do­naire, Jr.

Muling tinalo ni Donaire ang karibal na si Vic ‘The Raging Bull’ Darchinyan via ninth round TKO sa kanilang non-title, featherweight fight noong Nob­yembre 10 sa Corpus Christi, Texas. Sa nasabing rematch nila ni Darchinyan ay nagkaroon ang tubong Talibon, Bohol ng hairline fracture of the orbit bone sa ilalim ng kanyang kanang mata.

Sa kabila nito, sinabi ng 31-anyos na si Donaire na gusto kaagad niyang lumaban sa Enero ng 2014.

Nauna nang pinabagsak ni Donaire si Darchinyan sa fifth round para agawin sa Armenian fighter ang mga suot nitong International Boxing Federation (IBF) at International Boxing Organization (IBO) flyweight titles noong Hulyo ng 2007.

Bago talunin si Darchinyan ay nabigo muna si Donaire kay unified world super bantamweight cham­pion Guillermo Rigondeaux ng Cuba via unanimous de­cision sa kanilang unification championship fight no­ong Abril sa New York City.

Determinado si Donaire (32-2-0, 21 KOs) na resbakan si Rigondeaux (13-0-0, 8 KOs) para sa isang re­match.

Umiskor naman ng panalo sina World Boxing Or­ganization (WBO) minimumweight titlist Merlito ‘Tiger’ Sabillo (23-0, 12 KOs) at WBO light flyweight ru­ler Donnie ‘Ahas’ Nietes (32-1-4, 18 KOs) noong Nob­yembre 29 sa Smart Araneta Coliseum.

Muling naipagtanggol ng 29-anyos na si Sabillo ang kanyang WBO belt makaraang lusutan si Nicara­guan challenger Carlos Buitrago (27-0-1, 16 KOs) sa pamamagitan ng isang kontrobersyal na split draw de­cision.

Pinabagsak naman ni Nietes si Mexican Sammy Gutierrez (33-10-2, 23 KOs) sa 2:58 ng round three pa­ra patuloy na isuot ang kanyang WBO light flyweight belt.

Dalawang beses pinatumba ni Nietes si Gutierrez sa first round mula sa kanyang right cross bago ta­pusin ang Mexican sa third round buhat sa isang coun­ter right.

Inangkin naman ni Edrin Dapudong (29-5-0, 17 KOs) ang International Boxing Organization (IBO) junior bantamweight title matapos pabagsakin si South African Gideon Buthelezi sa round eight noong Hun­yo 15 sa Johannesburg, South Africa.