Westbrook itinakas ang Thunder

OKLAHOMA CITY -- Isinalpak ni guard Russell Westbrook ang isang corner 3-pointer sa natitirang 0.1 segundo sa overtime pa­ra itakas ang Oklahoma City Thunder sa 113-112 pa­nalo kontra sa Golden State Warriors.

Sinabi ni coach Scott Brooks na hindi si Westbrook ang dapat tumanggap ng bola base sa kanyang estratehiya.

Sa halip, si Kevin Durant sana ang kukuha ng bo­la para sa kanilang hu­ling posesyon.

Nagmintis si Durant, ang NBA scoring leader, sa hu­ling 12 segundo.

Napunta ang bola sa Gol­den State at ginamit ng mga opisyales ang replay pa­ra kumpirmahin ang ta­wag ng referee.

Matapos ang review ay tu­malbog ang 15-foot jump shot ni Serge Ibaka at na­hablot ni Thabo Sefolosha ang papalabas na bola para sa Thunder.

Ipinasa ni Sefolosha ang bola kay Westbrook at isi­nalpak ang 3-pointer laban sa depensa ni Harrison Barnes.

“When he tells people about out this one, he doesn’t have to exaggerate it because there’s no bigger fish story than what he did tonight,” sabi ni Brooks kay Westbrook.

Ang nasabing tirada ni Westbrooks ay nirebisa ng mga opisyales kasunod ang paggagawad dito ng tres.

“I’m not going to tie the game,” ani Westbrook. “There’s no need to tie the game. I did the same thing in Golden State but unfortunately it didn’t work out for us.”

Sa Toronto, tinalo ng two-time defending champions na Miami Heat ang Raptors, 90-83, para sa ka­nilang pang-siyam na sunod na panalo.

Tumapos si LeBron James na may game-high na 27 points mula sa 10-for-17 shooting.

Sa Indianapolis, nagta­la si Paul George ng 23 points, habang humakot si Roy Hibbert ng 13 mar­kers at 8 rebounds para igiya ang Pacers sa 93-73 paggu­po laban sa Washington Wi­zards.

Nag-ambag si Lance Ste­phenson ng 7 points, 11 re­­bounds at 10 assists.