89TH NCAA Men’s Basketball tournament Playoff berth para sa ‘twice-to-beat’ asam ng San Beda Red Lions

MANILA, Philippines - Aasinta ng playoff ang three-time champions na San Beda para sa isa sa da­lawang ‘twice-to-beat’ in­centive sa Final Four, ha­bang magpapatatag ang San Sebastian sa hawak sa ikaapat na puwesto sa 89th NCAA men’s bas­ket­ball tournament sa The Are­na sa San Juan City.

Makakaharap ng Red Lions ang host St. Benilde Blazers ngayong alas-6 ng gabi matapos ang labanan ng Stags at Lyceum Pirates sa alas-4 ng hapon.

May 10-2 baraha ang San Beda at kung manalo pa ay iiwanan nila ang ka­salo sa unang puwesto na Letran College.

Makakatiyak na rin si­la ng playoff dahil ang pi­nakamagandang pagta­tapos na kayang abutin ng mga nasa ika-limang pu­westong St. Benilde, Jo­se Rizal University at Emi­­lio Aguinaldo College ay hanggang 11 panalo lamang.

Sa ngayon, ang tatlong nabanggit na koponan ay may iisang 5-7 baraha na papasok sa kanilang hu­ling anim na laro sa elimi­na­tion round.

May tatlong sunod na pa­nalo ang Red Lions pero hindi sila maaaring mag­kumpiyansa sa Bla­zers na pinahirapan sila sa unang pagtutuos at natalo lamang ng isang puntos, 70-71, noong Hunyo 22.

Magpupursigi rin ang St. Benilde, nagmula sa dikitang 64-68 pagkatalo.

Ikaapat na sunod na pa­­nalo naman ang target ng Stags sa pagsagupa sa Pirates na nais madup­lika ang 60-55 upset sa first round.