High Voltage wagi sa Asistio Stakes Race

MANILA, Philippines - Punung-puno ng kuryente ang High Voltage para mapagharian ang 2nd Macario B. Asistio, Sr. Stakes Race na siyang tampok na karera kahapon sa San La­za­ro Leisure Park sa Carmona, Cavite.

Ginabayan ni jockey Pat Dilema sa ikalawang sunod na pag­kakataon, napangatawanan ng kabayong la­hok ni Hermie Esguerra ang pagiging slight favo­rite kasama ang coupled entry na Raon, nang hindi papor­mahin ang nakatunggaling Jahan sa 1,400-metrong karera patungo sa panalo.

Agad na inilusot ni Dilema ang kabayo sa pagbukas ng aparato at nagdikta ng matuling tiyempo para iwa­nan ng halos apat na dipa ang mga naghahabol.

Sinikap ni Baldonido na pag-initin ang Jahan at tila nagawa niya ito nang agawin ang ikalawang puwesto sa Well Well Well pero hindi nagbago ang tikas ng na­sa unahang High Voltage para manatili ang tatlong dipang agwat na kalamangan hanggang sa meta.

May 1:29 winning time ang High Voltage sa kuwartos na 12’, 25, 25, 27’ para halos pantayan ang 1:25 tiyempo na ginawa sa kaparehong distansya noong Peb­­­rero 24 sa Metro Turf Club.

Huling nanalo ang nasabing kabayo noon pang Peb­rero 1 sa race track na pag-aari ng Manila Jockey Club Inc., ang tagumpay ay nagresulta para angkinin ang P180,000.00 gantimpala.

Ang Jahan, pumangatlo sa Lakambini Stakes Race noong nakaraang taon, ay tumapos sa ikalawang se­gundo puwesto matapos ang huling karera noong Marso 19.

Dahil dikit ang bentahan, pumalo pa sa P9.50 ang ibi­nigay sa win ng High Voltage, habang ang liyamadong 4-5 forecast ay nagpamahagi pa ng P19.00 dibi­dendo.