Mga yumaong atleta, kaibigan, sports personalities aalalahanin sa PSA Awards

MANILA, Philippines - Isang mahabang listahan ng personalidad na kinabibilangan ng mga prominenteng atleta at kaibi-gan sa sports ang bibigyan ng posthumous award bukas sa PSA-Milo Annual Awards Night sa grand ballroom ng Manila Hotel.

Sina two-time Olympian Enrique Beech, naging tanyag na football player, dating basketball star Roehl Nadurata, cycling legend Manuel ‘Maui’ Reynante at broadcaster at sports columnist Butch Maniego na sumakabilang buhay noong nakaraang taon ay guguni-tain ng pinakamatandang media organization sa bansa.

Hindi rin makakalimutan ang mga kasamahan sa sportswriting fraternity na pumanaw kagaya nina editor at columnist Clarito Samson, Leo Reyes ng Philippine News Agency, photographer Oscar Estabaya ng Malaya, columnist at tennis organizer Ajay Pathak at dating editor at People’s Journal assistant editor Zean Macamay.

Ang iba pang aalalahanin sa two-hour special affair ay sina TV sports reporter Maan Panganiban, Bless Del Rosario ng Philippine Sports Commission chairman’s office, Nenita `Neth’ Mendoza ng Basketball Association of the Philippines, basketball tournament organizer Joey Lim, trackster Nanette Lusterio, Bert Landero ng softball, cagers Nap Flores at Eduar-do Baldomero at pro boxer Karlo Maquinto.

Isang minutong katahimikan ang iaalay sa kanila sa gala night na isasaere sa DZSR Sports Radio 918 at inihahandog ni Senator Chiz Escudero, ng San Miguel Corp., Smart, Meralco, Philippine Basketball Association, Globalport 900 Inc., Rain or Shine, SM Prime Holdings, ICTSI at Philippine Golf Tour, Philippine Sports Commission at LBC.

“The entire PSA family and Philippine sports in general, are one in extolling our departed brothers and sisters, who had touched our lives at one time or another,” sabi ni PSA president Rey Bancod ng Tempo.  

Magsisimula ang event sa ganap na alas-7:30 ng gabi kung saan sina basketball great Benjie Paras at Ai Dela Cruz ang magiging Masters of Ceremonies.

Magtatanghal din si Isabela De Leon.