Alupihan (204)

Pagkatapos pahi­gu­pin ng mainit na sabaw ng tinolang maya-maya, kinunan ng body temperature ni Hani si Cris.

“May lagnat ka pa Kuya! Kailangan talaga ipahinga mo nang todo.’’

“Mainit pa nga ang pakiramdam ko.’’

“Makakaya mo bang umakyat sa itaas Kuya para dun ka na sa room mo matulog. Hindi ma­ganda ang posisyon mo dito sa sopa. Nakabaluktot ka.’’

“Kaya ko namang umak­yat Hani.’’

“Aalalayan kita Kuya.’’

“Sige Hani.’’

“Ililigpit ko lang itong mga plato.’’

Pagkatapos iligpit ang mga plato ay inalalayan na ni Hani si Cris sa pag-akyat sa hagdan.

“Dahan-dahan lang Kuya.’’

Umakyat sila. Kaya pa nga ni Cris na umakyat.

“Malakas pa ang tuhod mo Kuya.’’

“Medyo.’’

“Akala ko mahihirapan ka sa pag-akyat.’’

Nang nasa itaas na sila ay deretso sila sa silid ni Cris. Nang makapasok ay inayos ni Hani ang kama ni Cris. Pi­nalitan ang sapin. Pati punda ng unan ay pinalitan din.

“Sige Kuya mahiga ka na.’’

“Salamat Hani.’’

Nahiga si Cris.

“After one hour ay pupunasan kita nang maligamgam na tubig para bumaba ang lagnat mo.’’

“Sige Hani. Salamat uli.’’

Pagkalipas ng isang oras ay dumating si Hani na may dalang maliit na plangganang may maligamgam na tubig at saka bimpo.

“Pupunasan na kita Kuya.’’

“Sige Hani.’’

Pinunasan ni Hani si Cris. Nahihiya pa si Cris dahil sa pagkuskos ng bimpo ni Hani sa kanyang likod.

“Mamaya wala na ang init mo Kuya?’’

“Sana nga Hani.’’

“Papalitan ko ang suot mong damit Kuya.’’

“Sige, ilang araw na nga itong suot ko.’’

Binihisan ni Hani si Cris.

“Marami na akong utang sa’yo Hani.’’

“Huwag mong intindihin­ ‘yun, Kuya.”

“Salamat Hani.”

Nang ang brief na ang isusuot ay tumalikod si Cris.

“Kaya ko na ito Hani. Salamat.’’

“Baka mahirapan kang isuot Kuya?’’

“Kaya ko na.’’ (Itutuloy)