LAGUNA, Philippines — Anim na katao kabilang ang isang may-ari ng construction firm ang natukoy ng mga awtoridad na nasa likod ng pagpatay sa isang miyembro ng Philippine Navy na natagpuang sa abandonadong sasakyan sa Sto. Tomas City, Batangas, nitong nakaraang Biyernes ng gabi.
Dalawa sa mga suspek na kinilala lamang sa pangalang alyas “Carlo”, 26, at “Jay”, 29 ay naaresto nang pulisya dahil sa pagpatay sa Navy intelligence officer na si alyas “Silanga”.
Sina alyas Carlo at Jay ay sakay ng isang inupahang Toyota Vios nang arestuhin ng magkasanib na grupo ng pulisya sa kahabaan ng tollgate ng South Luzon Expressway, nitong Sabado ng alas-7:20 ng gabi.
Itinago naman ng pulisya ang pagkakakilanlan ng may-ari ng construction firm, na umano’y ang utak sa krimen, ang kanyang bodyguard-aide, isang dating New People’s Army rebel na tinuturo bilang gunman, at isang tricycle driver kasama ang isang babae.
Isang nilikhang tracker team operatives ang nagsasagawa ng manhunt operation laban sa mga natitirang suspek kabilang ang mastermind.
Tinitingnan ng mga imbestigador ang “personal” na may kaugnayan sa pangongolekta ng utang bilang motibo sa pagpatay sa nasabing Navy officer.