DARAGA, Albay, Philippines — Kalaboso ang isang 31-anyos na lalaki matapos na mahuli umanong nagnakaw ng imahe ng “Mama Mary” sa Sto. Cristo Chapel sa Purok-4, Brgy. San Roque, Daraga, Albay noong Linggo ng umaga.
Kinilala ang suspek na si Roel Morato, binata, mangangatay ng karne at residente ng Brgy. Ilawod, Guinobatan.
Sa ulat, dakong alas-6:30 ng umaga, binuksan ng 67-anyos na caretaker ng chapel na si alyas “Salvacion” ang simbahan para sa mga magsisimba.
Lumapit umano at bumili pa sa kanya ng kandila ang suspek. Gayunman, ilang sandali ay nakitang sinubukang bitbitin ng suspek ang relic ng Sto. Cristo pero lumipat ito sa altar at binuhat ang rebulto ng mama mary na nagkakahalaga ng P10,000 saka mabilis a itinakas.
Natakot umanong humabol si Salvacion dahil may hawak na patalim ang suspek kaya humingi na lang siya ng saklolo sa mga barangay tanod at pulis pero hindi na inabutan ang kawatan.
Inabot ng halos isang oras ang mga pulis at tanod sa paghahanap sa suspek sa barangay at karatig na mga lugar hanggang maispatan nila ang huli na nagtatago sa madamong lugar ng Brgy. Bañag na dala pa ang imahe ni Mama Mary.
Agad na inaresto ang suspek at tagumpay na naibalik ang rebulto sa nasabing chapel.