MANILA, Philippines — Nagkalasug-lasog ang katawan ng isang 67-anyos na lolo matapos na mabangga ng isang pulang kotse na minamaneho ng nurse na napaidlip habang nagmamaneho sa kahabaan ng Rizal Street, Legazpi City, Albay. kahapon ng umaga.
Agarang nasawi dahil sa mga sugat at bali sa katawan ang biktima na kinilala lamang sa pangalang Ramon, residente ng Brgy. Lapu-lapu. Nahaharap naman sa kasong reckless imprudence resulting in homicide ang driver ng nakabanggang sasakyan na kinilala lamang sa alyas na Alvin, 35-anyos, ng naturang lunsod.
Sa ulat ni Legazpi City Police Station chief investigator Executive Master/Sgt. Carlo Paña, naglalakad umano sa tabi ng kalsada ang matanda nang mabangga ng kotse na minamaneho ng nurse.
Sa lakas nang pagkakabangga ay duguang tumalsik ng ilang metro ang biktima na agaran nitong ikinamatay.
Lumalabas sa imbestigasyon, bago nabangga ang biktima ay unang sumalpok ang kotse sa isang poste ng kuryente saka dumeretso ito sa naglalakad na biktima.
Inamin ng suspek na nasa kostudya na ng Legazpi City Police Station na nakatulog siya habang nagmamaneho dahil sa pagod at puyat galing sa pag-duty sa isang hospital dahilan ng aksidente.