MANILA, Philippines — Boluntaryong sumuko sa tropa ng pamahalaan ang mag-asawang opisyal ng New People’s Army (NPA) sa Brgy. Bato, Sagay City, Negros Occidental kamakalawa ng gabi.
Sa inisyal na ulat ng 3rd Infantry Division (ID) ang mga nagsisuko ay isang 31-anyos na Squad Leader at 27-anyos nitong misis na Finance a Logistic Officer ng nabuwag na Northern Negros Front ng NPA rebels.
Pansamantalang hindi tinukoy ng military ang pagkakakilanlan ng mag-asawa para sa kaligtasan ng kanilang pamilya habang patuloy na kinukumbinse ang kanilang nalalabi pang kasamahan na magsibaba na sa kapatagan at sumuko sa batas.
Nabatid na ang mag-asawa na may dalawang anak na 2 at 5-anyos ay mahigit isang dekada na ring kasapi ng kilusang komunista.
Sa inisyal na interogasyon, sinabi ng mag-asawa na nagdesisyon silang sumuko upang magbagumbuhay sa piling ng kanilang dalawang anak.