COTABATO CITY, Philippines — Patay ang isang 12-anyos na estudyante matapos masapol ng bala nang aksidenteng pumutok ang baril na nilalaro ng kanyang 15-anyos na kaibigan kamakalawa ng gabi sa tabing ilog ng Barangay Poblacion 1, dito sa lungsod.
Sa ulat ng Cotabato City Police Office kahapon, agad na namatay sa tama ng bala ang lalaking Grade 6 pupil na si Salahudin Salik, makaraang mabaril ng binatilyong kaibigan na itinago sa pangalang “Ahmad”.
Ayon sa kanilang mga kapitbahay, nasa tabing ilog sa RS Buan Area sa Barangay Poblacion 1 ang magkaibigan nang maganap ang insidente bago maghatinggabi nitong Huwebes.
May dala-dala umanong baril si Ahmad at kanila itong pinaglaruan hanggang sa biglang pumutok at aksidenteng nabaril sa tagiliran ang biktima.
Mabilis na tumakas ang binatilyong si Ahmad dala ang nasabing baril matapos mabaril ang totoy na kaibigan, ayon sa mga barangay officials at mga imbestigador na nagresponde sa lugar.