MANILA, Philippines — Tinambangan at pinagbabaril hanggang sa mapatay ng mga hindi pa nakikilalang suspek ang isang barangay chairman sa bayan ng Sultan Kudarat, Maguindanao del Norte at misis nito na nagsisilbing barangay secretary, kamakalawa ng gabi sa nasabing lalawigan.
Dead-on-the-spot ang mga biktima na kinilalang sina Brgy. Bulibod Chairman Esmael Latip Mustapha at misis niyang si Rahima Maulana Mustapah, secretary ng nasabing barangay.
Ayon kay Sultan Kudarat Municipal Police Station chief PLt. Col. Esmael Madin, nangyari ang ambush dakong alas-10:30 Linggo ng gabi habang papauwi na ang mga biktima.
Naglalakad umano ang mag-asawang Mustapah sa madilim na kalsada nang biglang sumulpot ang mga armadong kalalkihan at hinarang ang dalawa.
Nasa anim na kalalakihan na pawang armado ng matataas na kalibre ng baril ang rumatrat umano sa mag-asawang Mustapah sanhi upang kapwa bumulagta ang dalawang opisyal.
Nang makitang patay na ang mga biktima, mabilis na tumakas ang mga suspek bitbit ang mga armas na ginamit sa krimen.
Nagsasagawa pa ng imbestigasyon ang pulisya upang malaman ang motibo ng pamamaslang sa mag-asawa.