Wanted motornapper utas sa shootout, 2 arestado

COTABATO CITY, Philippines — Napatay ng mga pulis ang isang wanted na magnanakaw ng mga motorsiklo habang sugatan ang kanyang dalawang kasama sa isang engkuwentro sa Barangay Suben sa Presi­dent Quirino, Sultan Kudarat nitong Lunes.

Sa ulat nitong Lunes ng tanghali ni Brig. Gen. Augustus Placer, director ng Police Regional Office-12, tangka sa­nang aagawin ng mga armadong sina Bohari Basco, Oman Aliman at isang may alias na Arih ang motorsiklong Suzuki Raider 150 ng isang off-duty na sundalong si Sgt. John Acosta Valdez sa Barangay Suben sa President Quirino ngunit hindi nila itinuloy nang tumakbo palayo ang biktima at humingi ng saklolo sa mga kapitbahay.

Tumakas ang tatlo sakay ng isang motorsiklo ngunit inabutan ng mga kasapi ng President Quirino Municipal Police Station sa hangganan ng mga Barangays Suben at Mangelen at, sa halip na sumuko ay nanlaban kaya nagkapalitan ng putok.

Patay si Arih at sugatan naman sina Basco at Aliman sa naturang engkwentro na nagresulta rin sa pagkakakumpiska ng dalawang mga pistol, isang shotgun at ang Kawasaki Bajaj 125 na motorsiklo na gamit ng mga suspek.

Kinumpirma ng mga local executives ng President Quirino at mga karatig na bayan sa Sultan Kudarat at sa Tantangan, South Cotabato na sina Basco at Aliman ay mga miyembro ng isang armadong grupo na responsable sa pagkakaagaw sa walang labang mga motorista ng mahigit 20 na mga motorsiklo sa kanilang mga lugar nitong nakalipas na mga buwan.