Tiyo ng Army major, natagpuang patay
CAVITE, Philippines — Patay na nang matagpuan ang tiyuhin ng isang opisyal ng Philippine Army sa isang bakanteng lote kamakalawa ng gabi sa Coastal Bay Subdivision, Phase I, Brgy. San Rafael IV, bayan ng Noveleta, dito sa lalawigan.
Ang biktima ay kinilala sa alyas na “Chard”, nasa hustong gulang, caretaker ng isang ginagawang bahay na pag-aari ng pamangkin nito na isang Army Major.
Sa ulat, alas-11:47 ng gabi nang makatanggap ng tawag ang pulisya mula sa isang security guard ng nasabing lugar hinggil sa diumano’y may isang lalaking natagpuan na wala nang buhay sa bakanteng lote ng nasabing subdivision.
Ayon sa pagsisiyasat ng pulisya, umaga ng nasabing araw nang huling makitang buhay ang biktima.
Kasalukuyang isinailalim sa autopsy ang bangkay ng biktima upang mabatid ang sanhi ng pagkamatay nito.
Habang nangalap na rin ng mga CCTV footage ang pulisya sa pagkakakilanlan ng posibleng suspek sa pagpatay sa biktima.
- Latest