Drug operasyon sa Pampanga: 8 huli, P1.7 milyong droga samsam

MANILA, Philippines — Walong pinaghihinalaang drug personalities ang nasakote habang nasa P1.7 milyong halaga ng illegal na droga ang nasamsam ng mga awtoridad sa isinagawang magkakahiwalay na anti-illegal drug operation sa Pampanga, ayon sa ulat ng opisyal nitong Sabado.

Sa report ni P/Brig. Gen. Jose Hidalgo Jr., Director ng Police Regional Office (PRO) 3, nasakote sa serye ng buy-bust operation nitong Mayo 1-2 ang mga suspect.

Unang nabitag sa Brgy. Ninoy Aquino, Angeles City ang mga drug personality na sina alyas “Gio” at alyas “RJ” na nakumpiskahan ng 70 gramo ng shabu na nagkakahalaga ng P476,000.

Bukod rito, nakumpiska sa mga suspek ang isang caliber .38 revolver na may kargang ilang mga bala at ang isang kulay ubeng Yamaha Mio Sporty na gamit sa kanilang illegal na aktibidades.

Nasakote naman ng mga elemento ng Angeles City Police-Drug Enforcement Unit at Police Station 3 si alyas “Ate” sa drug operation sa Brgy. Cutud, Angeles City at nakumpiska sa mga suspek ang 55 gramo ng shabu na may P374,000 ang halaga.

Samantala sa Brgy Poblacion, Mabalacat City, nasakote sina alyas “Bong”, “Nog” at “Meinando” makaraang makumpiskahan ng 56 gramo ng shabu na nagkakahalaga ng P380,000.

Ayon pa kay Hidalgo,  nahuli rin kamakalawa sa Brgy. dela Paz, San Fernando City sina alyas “Jonel” at alyas “Jerome” makaraang makuhanan ng 70 gramo ng shabu na nagkakahalaga ng P476,000.