3 CAFGU todas, 3 pa sugatan sa ambush!
MANILA, Philippines — Tatlong kasapi ng Citizens Armed Forces Geographical Unit (CAFGU) ang nasawi at tatlo pang kasamahan ang nasugatan matapos silang tambangan at pagbabarilin sa Barangay East sa Marogong, Lanao del Sur nitong Martes ng umaga.
Sa hiwalay na ulat nitong Miyerkules ni Brig. Gen. Prexy Tanggawohn, director ng Police Regional Office-Bangsamoro Autonomous Region, at ng mga opisyal ng 103rd Infantry Brigade sa Marawi City, agad na nasawi sa mga tama ng bala ang tatlong miyembro ng CAFGU na kinilalang sina Richard Dorano, Aljon Claver at Gino Sacare sanhi ng naturang pananambang.
Tatlo pang miyembro ng CAFGU na sina Marvi Ausan, Aljai Bagalanon at Renegie Culibao, ang nagtamo rin ng mga tama ng bala sanhi ng naturang ambush na agad namang naisugod ng mga emergency responders sa isang ospital sa hindi kalayuang bayan ng Malabang sa Lanao del Sur.
Lumalabas sa imbestigasyon na magkakasama ang anim na biktima sa isang sasakyan patungo sana sa kanilang detachment na malapit sa isang hydroelectric plant ng Matling Industrial and Commercial Corporation nang paulanan ng bala ng M14 at M16 assault rifles ng mga lalaking nakapuwesto sa gilid ng kalye.
Ayon kay Tanggawohn, matapos na ratratin ang mga biktima ay mabilis na nagsitakas ang mga armadong responsable sa pananambang na hindi pa natutukoy kung anong grupo.
Patuloy ang imbestigasyon ng Marogong at Malabang Police upang matukoy ang pagkakakilanlan ng mga suspek na nag-ambush sa mga biktima para masampahan ng kaukulang mga kaso, ayon kay Tanggawohn.
- Latest