Magtatay pinatay ng kaanak dahil sa lupa

MANILA, Philippines — Karumal-dumal ang sinapit na kamatayan ng mag-ama sa kamay ng sariling kaanak matapos pasukin at pagtatagain sa kanilang bahay sa Brgy. Pawik, Magallanes, Sorsogon, kamakalawa ng gabi.

Kapwa dead-on-the spot dahil sa malalalim na taga sa iba’t-ibang bahagi ng katawan ang mag-amang sina Joselito Ebio Jarabejo, 63; at Joshua, 23, kapwa magsasaka at residente ng naturang lugar.

Kinasuhan na ng double murder ang tumakas na  suspek na si Jayson Jerao Jarabejo, 32.

Sa ulat, dakong alas-7:00 ng gabi habang nasa loob ng kanilang bahay ang mga biktima nang biglang pumasok ang suspek na armado ng itak.

Bago pa nakakilos ang mag-ama ay walang kaabug-abog at bigla silang pinagtataga ng suspek na kapwa duguang humandusay.

Sa inisyal na imbestigasyon, posibleng alitan sa lupang sinasaka ang dahilan nang pamamaslang.