PIO V. CORPUS, Masbate, Philippines — Dead-on-the spot ang 37-anyos na karpintero matapos pasukin sa bahay at pagbabarilin ng tatlong pinaniniwalaang kasapi ng New Peoples’ Army sa Sitio Tipolo, Brgy. Buenasuerte, Pio V. Corpus, Masbate kamakalawa ng umaga.
Napuruhan ng punglo sa iba’t ibang bahagi ng katawan ang biktima na si Nelson Dalumpines Roque, may-asawa habang tinutugis na ng awtoridad ang mga kasapi ng komunistang grupo sa lugar.
Sa ulat, alas-5:30 ng umaga, kagigising lang at nasa loob ng kanilang bahay ang biktima nang biglang dumating at pumasok ang mga suspek na armado ng mahahabang uri ng baril sa bahay.
Sa hindi malamang dahilan, walang kaabug-abog na pinagbabaril ang biktima ng mga suspek saka sila mabilis na nagsitakas patungo sa bulubunduking bahagi ng Brgy. Cabangrayan.
Nakuha ng mga rumespondeng pulis sa pinangyarihan ng krimen ang ilang basyo ng bala ng M16 armalite rifle.