TUGUEGARAO CITY, Cagayan, Philippines — Patay ang isang kapitan ng barangay matapos pagbabarilin ng mga hindi pa natutukoy na riding-in-tandem sa bahagi ng Barangay Bicok sa bayan ng Tuao ng lalawigang ito, kamakalawa ng umaga.
Nakilala ng Tuao Police ang nasawing biktima na si Dante Blanza, 61, residente at chairman ng Barangay Sto. Tomas sa nabanggit na bayan.
Sa inisyal na imbestigasyon ng pulisya, sakay sa kanyang XRM na motorsiklo ang biktima angkas si Brgy. Kagawad Eduardo Montorio, 61, nang huminto sila sa gilid ng kalsada para magsuot ng face mask dakong alas-9:00 ng umaga.
Dito na umano sila tinabihan ng isang motorsiklo na sumusunod sa kanila at agad na pinagbabaril si Blanza sa iba’t ibang bahagi ng kanyang katawan.
Agad na isinugod sa St. Paul Hospital sa Tuguegarao City ang biktima subalit idineklara itong dead-on-arrival matapos mapuruhan ng punglo sa dibdib habang mapalad na hindi tinamaan ng bala ang kanyang backrider na si Montorio.
Napag-alaman na patungo sana sa Department of Agriculture si Blanza para magsumite ng ilang mga dokumento nang sundan sila ng mga suspek.
Patuloy ang imbestigasyon ng pulisya sa motibo sa pamamaslang sa kapitan at matukoy ang mga salarin.