MANILA, Philippines — Sa halip na manok ay rehas na bakal na ngayon ang hinihimas ng walong katao matapos mahuli sa aktong pagsasagawa ng tupada sa Sitio Yas-Yas, Brgy. Kaychanarianan, Basco, Batanes.
Ang mga naaresto ay kinilalang sina Wilson Eriful, Pablo Nipes, Claudio Atunay, William Bayaras, Aurelio Dela Fuente, Jerome Salamagos, Martin Alcazar, at Miguel Medina, nasa hustong gulang at pawang mga residente sa naturang lugar.
Nakarekober ang pulisya mula sa kanilang pangangalaga ng pitong tari, anim na panabong manok, (lima rito ay patay na, at isang buhay) at P980 na pusta.
Nakakulong na ang mga suspek sa Basco Police Station at kinasuhan ng Illegal Cockfighting.