3 sugatan sa pagsabog ng Granada

MATALAM, North Cotabato, Philippines — Tatlo ang nasugatan kabilang ang isang 10-anyos na bata nang sumabog ang pinaghihinalaang granada sa tabing kalsada sa Barangay Kilada, kamakalawa.

Kinilala ang mga biktima na sina Elizabeth at Florencio Wahing, at ang paslit na kanilang anak matapos na sila ay magtamo ng mga sugat sa iba’t ibang katawan mula sa shrapnel ng granada.

Sa ulat, magkakasamang naglalakad ang tatlong biktima sa national highway patungo sa tindahan na sakop ng nasabing barangay nang may naghagis umano ng granada sa kanila ng isang lalaki na agad tumakas.

Ayon naman kay Major Junrel Amotan, hepe ng Matalam municipal police station, na bago naganap ang paghagis ng granada ay mayroon umanong naganap na barilan sa lugar.

Inaalam pa ng mga police ordnance experts kung granada o home-made explosive ang gi­­na­­mit sa pag-atake.