MANILA, Philippines — Isang 66-anyos na lola ang nasawi matapos matumbok ng motorsiklo habang naglalakad sa gilid ng kalsada sa Brgy. Buhay na Tubig, Imus Cavite, kamakalawa ng gabi.
Patay agad sa insidente ang biktimang nakilalang si Maria Bartolay Orceo, may-asawa, residente ng Brgy.Buhay na Tubig habang sugatan naman at kasalukuyang inoobserbahan sa pagamutan ang driver ng motor na nakilalang si Armstrong Albios Pinto, 49.
Sa imbestigasyon, alas-9:40 ng gabi nang maganap ang insidente sa Buhay na Tubig Road kung saan naglalakad ang biktima sa gilid ng kalsada nang tumbukin ito ng Honda ZN125MK Motorcycle, na minamaneho ng suspek.
Sa lakas ng pagkakasalpok ay tumilapon ang matanda habang sumemplang at sumadsad ang motor kasama ang suspek.
Hindi na umabot pa ng buhay sa pagamutan ang biktima habang kasalukuyan pa ring inoobserbahan ang suspek.