Libon, Albay ,Philippines — Patay ang isang barangay tanod matapos na tangayin ng rumaragasang tubig baha at malunod sa ilog makaraang pilitin ang sarili na mag-duty sa kabila nang malakas na bagsak ng ulan sa Brgy. Mabayawas ng bayang ito kamakalawa ng hapon.
Ilang oras na naghanap ang kanyang mga kasamahang tanod na rumesponde bago natagpuan ang bangkay ng biktimang si Edward Renegen Madrid, 33, residente ng naturang lugar.
Sa ulat, dakong ala-1 ng hapon ay nagpilit ang biktimang magpunta sa brgy. hall para mag-duty at maghanda sa responde sa anumang emerhensya dahil sa walang patid na mga pag-ulan.
Gayunman, habang tumatawid ang biktima sa Del Rosario River ay biglang tumaas ang tubig baha at tinangay ang biktima.
Agad rumesponde ang mga kasamahan at hinanap ang tanod. Alas-3 na ng hapon nang matagpuan ito na wala nang buhay sa malayong bahagi ng ilog.