DASMARIÑAS CITY, Cavite, Philippines — Tatlong miyembro ng gunrunning syndicate ang nakipagbarilan sa mga pulis na ikinasawi ng isa habang dalawa ang nasugatan sa isang checkpoint sa Brgy.Salawag ng nasabing lungsod,kahapon ng madaling araw.
Kinilala ang nasawing suspek na si Domingo Macunay, habang nasugatan ang dalawang kasama nito na sina Jose Pepito Rusco, 36; at Abdul Samie Umadan Sultan, 33, pawang mga residente ng nasabing lungsod.
Batay sa ulat,bago naganap ang shootout, alas-12:30 ng madaling araw ay nagbabantay sa checkpoint ang mga tauhan ng PCP 4-Salawag nang mamataan nila na paparating ang kulay puting taxi na walang plaka.
Pinatigil ito ng mga pulis,subalit sa halip na tumigil ay mabilis itong umarangkada at pinaputukan umano ang mga pulis.
Kaya’t hinabol ng mga pulis ang nasabing taxi na kung saan ay nagpalitan ng putok ang magkabilang panig hanggang sa makorner ang mga suspek.
Nang lumabas ang mga suspek sa taxi ay pawang sugatan ang mga ito at dinala sa Pagamutan ng Dasmariñas na kung saan ay idineklarang dead on arrival si Macunay.
Narekober sa sasakyan ng mga suspek ang isang fragmentation hand grenade, isang unit ng snub nose cal. 38 na walang serial number na puno ng bala, isang FCC, dalawang unit ng Cal. 45 na may serial number 916394 habang ang isa pa ay walang serial number, 2 FCC, 4 na FCC para sa Cal. M16; 9 na FCC para sa 9Mm, 2 plastic sachet na naglalaman ng mga shabu at 1 piraso ng plastic sachet na may lamang marijuana at 2 itim na helmet.