TALAVERA, Nueva Ecija, Philippines — Arestado ang isang 55-anyos na lalaking may nakabinbin na kasong “acts of lasciviousness” makaraang mahulihan ng hinihinalang shabu sa isinagawang buy-bust operation ng pulisys sa Barangay Gulod, dito, kamakalawa ng tanghali. Kinilala ni P/Lt. Col. Heryl Bruno, hepe ng pulisya rito, ang suspek na si Herenato Rayos, may-asawa ng Barangay Burnay ng bayang ito.
Ayon sa ulat, alas-12:45 ng tanghali nang isagawa ang buy-bust at nakuha umano sa suspek ang may walong plastic sachet ng hinihinalang shabu na aabot sa 5.20 gramo at nagkakahalaga ng P35,360. Nabatid na bukod sa kanyang kasong pang-aabuso, nakatala rin umano ang suspek sa drug watchlist sa bayang ito bilang pusher at user.