CABANATUAN, Nueva Ecija, Philippines — Matapos na magsagawa ng sabayang pagbubukas ng 34 community pantry noong Abril 21, muling nagsama-sama ang 34 istasyon ng pulisya sa lalawigang ito para sa “BARANGAYanihan Linis sa Barangay” na nagsimula kahapon ng umaga.
Pagputok pa lamang ng haring-araw, pinangunahan na nina P/Col. Jaime Santos, provincial director ng Nueva Ecija Police Provincial Office (NEPPO) at P/Lt. Col. Victor Cacdac, hepe ng Provincial Community Affairs and Development Unit (PCADU) ng NEPPO, ang may 32 police stations at dalawang mobile force company para sa province-wide na sabayang paglilinis ng kapaligiran.
Naging katuwang ng pulisya at kanilang personnel ang napiling iba’t ibang barangay sa kanilang nasasakupang istasyon ang mga volunteers ng kanilang mga barangay at mga miyembro ng “Kabataan Kontra Droga at Terorismo” (KKDAT).
Ang aktibidad na ito ay palagian na umanong gagawin ayon kay PD Santos. Naglalayon umano ito na maitaguyod ang isa sa mga “core value” ng PNP organization na “Makakalikasan” upang palakasin ang ugnayan ng pulisya at komunidad.