Top 1 most wanted ng Nueva Vizcaya, timbog

SANTIAGO CITY, Isabela, Philippines — Arestado ang tinaguriang Top 1 most wanted sa lalawigan ng Nueva Vizcaya na nahaharap sa kasong 9 na bilang ng panggagahasa matapos maaresto sa bayan ng Dupax del Norte, ayon sa ulat ng pulisya kamakalawa.

Kinilala ng Dupax del Norte Police ang naaresto na si Renato Diola, 40, magsasaka at residente ng Purok Molave, Barangay Bitnong sa nabanggit na bayan.

Ayon kay P/MAJ. Myla Paguyo, hepe ng pulisya, si Diola ay inaresto sa bisa ng warrant of arrest na inilabas ni Judge Paul Attolba Jr., ng RTC Branch 30 sa Bayombong, Nueva Vizcaya kaugnay sa 9 counts of rape sa kanyang pamangkin.

Ayon sa ulat, taong 2016 nang simulang gahasain ng akusado ang noon ay 11-anyos na biktima sa isang masukal na lugar matapos umanong sunduin ni Diola ang biktima sa eskwelahan na ilang beses nasundan hanggang 2019.

Ayon naman kay P/Col. Ranser Evasco, provincial police director, wala inirekomendang piyansa ang korte para sa pansamantalang kalayaan ng akusado.