JAEN, Nueva Ecija, Philippines — Patay ang isang security guard matapos barilin ng nakaabang na berdugo habang pauwi lulan ng motorsiklo at angkas ang kanyang mag-ina sa Brgy. Sapang ng bayang ito, noong Lunes ng gabi.
Kinilala ni P/Major Baltazar Corpuz, hepe ng pulisya rito, ang napatay na biktima na si Domingo Pelembergo, 44, ng Purok 5, Barangay Niyugan, Jaen.
Sa ulat, alas-7:30 ng gabi, galing umano sa duty at pauwi na ng bahay ang biktima sakay ng kanyang motorsiklo at angkas ang kanyang misis na si Rossana, 41, at bunsong anak na 12-anyos na babae nang maganap ang pananambang.
Ayon sa ginang, bigla na lamang sumulpot sa kanilang likuran ang hindi pa nakikilalang gunman na sakay ng hindi pa tukoy na sasakyan at nirapido ang kanyang asawa sa pagkabigla nilang mag-ina. Bagama’t may tama na sa katawan ay nagawa pa umanong igilid at alalayan ng biktima ang angkas nitong mag-ina bago malagutan ng hininga.
Tumakas ang suspek matapos ang pagpatay sa biktima.