TUGUEGARAO CITY, Cagayan, Philippines — Kinatay ng isang selosong 32-anyos na mister ang sariling misis matapos madatnang nakikipag-chat sa cellphone sa ibang lalaki sa kanilang bahay sa Bayambang, Pangasinan kamakalawa ng gabi.
Sa report ng Bayambang Police, lango sa alak nang umuwi si Ronmel de Guzman sa kanilang bahay at agad kinompronta ang 25-anyos nitong misis na si Geneva kung bakit nakikipag-chat sa ibang lalaki hanggang sa mauwi sa mainitan nilang pagtatalo.
Dahil sa kalasingan, tila naburyong si Ronmel hanggang sa kumuha ng patalim at pinagsasaksak ang misis sa iba’t ibang bahagi ng katawan na naligo sa sarili nitong dugo.
Isinugod sa ospital si Geneva ng mga sumaklolo subalit hindi na siya umabot nang buhay habang nadakip sa follow-up operation si Ronmel na noon ay nahimasmasan na at sising alipin sa pagpatay sa asawa.